Документ жүргүзүү менен байланышкан милдеттерди натыйжалуу аткаруу үчүн кызматкерлерге базалык билимдерди жана көндүмдөрдү камсыз кылуу, ошондой эле иш кагаздарын жүргүзүүнүн негизги принциптерин жана процесстерин өздөштүрүү максатында 2024-жылдын 27-ноябрынан 28-ноябрына чейин КР ФМ Окуу борбору тарабынан Кыргыз Республикасынын Финансы министрлигинин борбордук аппаратынын, ведомстволук, аймактык бөлүмдөрүнүн кызматкерлери үчүн “Персоналдын онбординги: Документ жүгүртүүнүн жана иш кагаздарын жүргүзүүнүн негиздери” темасы боюнча квалификацияны жогорулатуучу окуу курсу өткөрүлдү.

Бул окуу курсунун тренерлери төмөнкүлөр болушту:

Исраилова Аида Озгоновна - Кыргыз Республикасынын Финансы министрлигинин Иш кагаздарын жүргүзүү жана аткарууну контролдоо бөлүмүнүн башчысы, темасы: “Иш кагаздарын жүргүзүүнүн уюштуруу негиздери. Кыргыз Республикасынын Финансы министрлигинин регламенти”;

Үчкемпирова Асель Белековна - Кыргыз Республикасынын Финансы министрлигинин Мамлекеттик тил жана лингвистикалык экспертиза бөлүмүнүн башкы адиси, темасы: “Иш кагаздарынын текстеринде көп кездешүүчү каталар. Буйруктардын, кызматтык каттардын, арыздардын, түшүнүк каттардын тексттери. Кыргыз тилинин орфографиялык эрежелери боюнча туура жазуу”;

Азизова Айжан Төрөбековна - Кыргыз Республикасынын Финансы министрлигинин Укуктук камсыздоо башкармалыгынын башкы адиси,

Курманбеков Нурсултан Кубанычевич - Кыргыз Республикасынын Финансы министрлигинин Укуктук камсыздоо башкармалыгынын башкы адиси, темасы: “Ченемдик укуктук актылардын долбоорлорун иштеп чыгуунун өзгөчөлүктөрү”;

Кулалиева Калия Одесовна - филология илимдеринин кандидаты, Кыргыз-Түрк «Манас» университетинин доценти, темасы: “Кыргыз Республикасында иш кагаздарын жүргүзүү боюнча типтүү нускама. Иш кагаздарын тариздөө үлгүлөрү. Иш кагаздарынын түрлөрү. Иш кагаздарынын лексикалык, грамматикалык өзгөчөлүктөрү”.

            Бул окуу курсунда 112 угуучу окуду (алардын ичинен офлайн форматында – 21 угуучу жана онлайн форматында – 91 угуучу катышты) .